|
天气阿姐心情报告 天气冻咗几日，不过唔见有雨水天，仲以为呢个冷空气冇乜后劲，点知今天就阴天兼会落雨喇！虽然温度比前两日要暖一DD，不过落雨湿湿点样都令人觉得有D冻……“冷冷雨，WO～没焦点因找不到你……”不过伤感还伤感，工都系要返嘎，如果想自己心情好D，就要喺雨天必备嘅两大工具——雨遮、水鞋上面落功夫啦！着番对靓靓嘅有花纹嘅水鞋，远远望去就好似着住对长靴咁，保证同事朋友都话你最IN！YEAH！ 阴，有中到大雨13℃～16℃湿度：70%～92% 吹2-3级东北到东风 旧历二月十四 宜：沐浴扫舍祈福订盟 忌：安床开市立券作灶 水鞋指数 仿靴式花纹至潮 听讲呢两日会有中到大雨，喺坑坑洼洼嘅马路面，多多少少都会有D积水，如果着对靓靓布鞋出去，对鞋咪变成“花面猫”？但系传统型嘅水鞋又好老土，点着返工啊！落雨天真系苦煞白领美眉喇！唔使担心，阿姐有好桥，就系拣对而家好流行嘅仿靴式嘅水鞋，咩新潮花纹都有，喺雨雾之中望落去就好似一对长筒靴咁！啱晒嗰D中意方便又贪靓嘅OL！ 买盐指数 抢购没必要 琴日听朋友讲，话收工之后要去超市抢购碘盐，仲话而家有D超市已经脱销添。不过琴日广东省盐务局等好几个部门都出嚟澄清，话日本核辐射唔会影响我国海域，所以抢购碘盐完全无必要。所以大家唔使咁“腾鸡”（紧张之意），保持平常心就得喇！ 美食指数 打边炉暖粒粒 如果有人问冬天食D乜，相信好多人都会话“打边炉”！不过今年春天都可以打边炉，皆因呢两日嘅天气够冻！所谓“边炉滚一滚，神仙都企唔稳”，不如今晚返屋企打边炉啦！不过为咗健康，最好多放些青菜少吃肉，就咁又健康又暖胃啦！ 周末指数 去桌游吧玩三国杀 呢个周末落雨丝湿，真系咩嘢出街欲望都冇，不过难得一周WEEKEND，冇理由“屈”喺屋企咁无聊嘎？！不如约埋一帮“死党”，去桌游吧HAPPY下啦！三国杀、狼人、UNO、“回转寿司”……个个都要用脑之余又好盏鬼，最啱一大班人齐娃娃过下瘾。喺玩桌游之余仲可以同老友叙下旧，一举两得啦！ （整理 陈颖雅 漫画 王云涛） (本文来源：金羊网-新快报 ) (责任编辑：布鞋家园) |
